الأربعاء، 2 مارس 2011

كلمة مني ليك ياريس


كلمة مني ليك ياريس جيت الدنيا دي ولقيت رئيسي هو مبارك كبرت وبشوفه كل السنين لدرجة اني جيت في مرة تصورت ان مافيش انتخابات رئاسية(بينجح تذكية يعني) اشوف كل يوم سلبيات ويقولوا بنصلح وبنعمل شركات وخطوات هتتنفذ سنة 2050 هتخلي الكل يرتاح زى مثلاً مشروع توشكي اللي الشعب كله اتهني بسببه اووي ومشاريع تانية كتير اتخصخصت وتوفير اراضي زراعية للشباب الخريجين فى الصحراء اقول يا سلام ده كلام منطقي جداً ماكنتش برضه وانا صغير اعرف يعني ايه خصخصه فكرت انها اسلوب جديد لحد ما عرفت من زمان برضه اننا بنبيع الدولة شوية شوية انهاردة شركة كهرباء بكره شركة مياه بعده غاز بعده اراضي الصحراء للعرب واليهود والامريكان وحاجات تانية كتييييير. ولما كنت بسمع عن الفشل الكلوي المنتشر اقول عندنا نهر النيل وفشل كلوي بالنسبة دي امال لو مافيش نهر النيل !!!! عرفت ان مياه الصرف بتدخل على مياه الشرب ( النيل ) وتسبب امراض بس ليه ماسمعتش من الناس المهمة اوي فى الدولة عندهم فشل كلوي واحد قالي هما هيشربوا زي حضرتك قولت صحيح هتربط حمارتك جنب حمارة العمده,,يمكن كتير من الناس بتقول الحكومة عملت حاجات كتيييير كويسة والريس حارب علشان بلده طيب ما فيش اعتراض على كده وكمان يقولك يمشي بكرامته برضه مش معترض علشان احتراماً لينا قبل احترامنا ليه بس السؤال ليكم بقى .. ليه الريس المبجل المحترم اللي بكيتوا من خطابه ما احترمش من 30 سنة الناس اللي بتموت من الفقر والجوع والامراض اللي سببتها وزاراته تحت إشرافه.هل كرامة الريس اغلي علشان رئيسنا طيب ما اللي مات اخواتنا وممكن يكون ابويا او امي . ليه خايف على كرامته وعلى الفوضى زى ما قال وسايب الشعب متهان بره بلده علشان لقمة العيش ويهان من عربي مع احترامي ليهم جميعاً احنا اللي صنعناهم وكله عارف كده بس برضه الريس من كرمه الزائد باااااااااع كرامتنا بره وجوه ,, فين الكرامة ياريس اللي ادتهلنا علشان تطلبها مننا ,, وفي فوضي اكتر من انك تدي اوامر بضرب النار علينا وتموتنا ,, ولا في ثانية اصبحنا اعداء الوطن واصحاب اجندات, عملت كتير ياريس,موت شبابك ياريس, دفنت شعبك بالحيا من زمان ياريس, امن الدولة حمتنا كتير وقانون الطوارئ والتعذيب ريحنا كتييير, كتر خيرك ياريس سيبنا بقى وارحمنا احسن خلاص زهقنا من كرمك الزيادة ده ..وعلى رأي الشاعر الجو هادي خالص والدنيا .......... احنا مش بنخرب بلدنا ولا هنخربها لانها بلدنا كلنا ... ابوبكر عادل ...مصري بحب بلدي

ليست هناك تعليقات:

إرسال تعليق

 
Copyright © ثقف نفسك-أبداعات الاعضاء. All rights reserved.
ثقف نفسك created by Almowhed Designed by Almowhed